بسم اللہ الرحمان الرحیم،
لوگوں کو کیسے متاثر کریں، اور دوست بنائیں۔ یہ کتاب ۱۹۳۷ میں چھاپی گئی۔ اب تک ڈیڑھ کروڑ سے زائد کتابیں فروخت کی جاچکی ہیں۔ یہ کتاب دنیا کی تمام بڑی زبانوں میں پچھلے سات عشروں سے چھاپی جا رہی ہے۔ اس کےمصنف دنیا کے سب سے بڑے مصنفین میں سے ایک، ڈیل کارنیگی ہیں۔یہ کتاب دنیا کی مشہور ترین کتابوں میں سے ایک کتاب ہے۔اس کتاب کی بنیاد اس توجیہ پر ہے کہ انسان کی بحیثیت انسان تربیت، اسکی زندگی اور بزنس میں کامیابی کیلئے بہت زیادہ ضروری ہے۔
ڈیل کارنیگی، انسانی کامیابی میں انسان کی تربیت پر لکھنے والے مصنفین میں سب سےپہلا اور بڑا نام ہے۔ اس کا ماننا تھا کہ آمدنی بڑھانے کیلئے صرف بزنس کی تعلیم اور سکلز سے کام نہیں چلے گا۔ بلکہ ایک انسان کی تربیت بھی بہت ضروری چیز ہے۔ چاہے کسی نے اپنی آمدنی بڑھانی ہے، پروموشن لینی ہے۔ یا بزنس کو بڑا کرنا مقصود ہے۔ انسانوں سے سلوک اور ہینڈلنگ سیکھنا ناگزیرہے۔ اور آج جدید دور کی سائنس اور سائیکالوجی بھی اس بات کو تسلیم کر چکی ہے۔
یہ کتاب، ویسے تو بزنس کی دنیا میں بھی ایک بہت بڑا نام ہے۔ لیکن یہ کتاب انسانی رویوں اور تربیت پر لکھی گئی ہےکیونکہ مصنف کا ماننا یہ ہے کہ آپ بزنس میں بھی کامیاب ہونے کیلئے یہ لازم ہے۔ یہ کتاب ایک انسان کو اس قابل بنا دے گی کہ وہ جھگڑے اور تنازعات کو ہنڈل کر سکے، دوسروں کو اپنے خیالات پر قائل کر سکے، ایک متاثر کن لیڈر بن سکے، اور مذاکرات میں کامیاب ہوسکے۔ اس طرح سے ہم کہہ سکتے ہیں کہ یہ کتاب بنیادی طور پر صرف بزنس میں ہی نہیں بلکہ، زندگی کے ہر میدان میں کامیابی کی ضامن ہے۔
اس کتاب میں دیئے گئے اصولو ں پر عمل کرنے سے نہ صرف یہ کہ انسان مسائل اور تنازعات کو حل کر سکتا ہے بلکہ اگر ان پر عمل کیا جاےَ، تو یہ مسائل اور تنازعات پیدا ہی نہیں ہونگے۔ اور یہ اصول کسی بھی انسان کو اس قابل بنا دیں گے کہ وہ ایک ایسا لیڈربن جاےَ جسکی عزت کی جاےَ، جس سے لوگ محبت کریں گے، اور یہ سارا کچھ صرف اس کتاب کے اصولوں پر مبنی لائف سٹائل سے ممکن ہو جاےَ گا۔ اور کم از کم ، یہ اصول آپ کو اس قابل کردیں گے کہ آپ جہاں رہیں گے، جن لوگوں سے ملیں گے، وہ آپکو بہت اچھی طرح سے یاد رکھیں گے۔